Di C.Galas se ho ben capito, fonte in calce.
La dieta, no ghe zeroti che tegna...
L’era da mési che la spósa la seitéva a … róter i zebedèi co sta storia che ero (e som ancora) màssa cicióm, che a na zerta età se te sfóndi la bilanza, podrìa anca vegnìrte ‘n colp che se no ‘l te porta drìt de là tut mal el te fa star dal de chì malament, che dovevo desmentegarme luganeghe, formài, vim, lardo, biràze, stinchi, costine, strangolapreti… ensóma tut quel che dalbòm, se ancoi fussa ‘l me ultim dì, tacherìa a magnar subit per tràrme ‘nvanti.
Gh’el digo ai zòveni che magari i se fa ciapàr da quel che… tira pù d’en càr de bòi: sté calmi, che a rovinarve fé semper en prèssa. E quando le ve ciàpa per el copìm… l’è zamai massa tardi, diaolporco.
Bèm, tut mal, sta sólfa dela panza che l’era (e l’è) massa grossa l’è nada ‘nvanti per mesi. En mèz, diete de salata, frulài de tuti i fruti de stagiòm, zò le màm dal pàm, guai a robàr al Poli en salamìm… el vegniva subit méss via chisà dove (ma chi elo che lo magneva al posto mio, can da l’ua?). Per no parlar de quele baréte (bòne per quel) che doveva ciapàr el posto de pastasùte, cotoléte, patatine e bàle varie.
La matina, po’, zó a cavar erbaze, via col cagnot a tor el giornal, de chi e de là a portar su o zo robe che per mi le podeva star dove che le era ancora per ani. Ensoma, l’unica volta che podevo sfogarme (anca adés per quel) l’era la matina quando névo en giro col cagnòt. Al Primavera i lo saveva (e i lo sa) che la néva de briòss, cafè dopio, spremuta… e dopo ghe scapéva magari anca en prosech co le patatine.
Fim quando no me resta nele scarsele dele braghe el scontrìm, diaol de quel porcooo, con su scrit quel ho magnà. Da alora en scarsela sol i soldi contài per el giornale e ‘n cafè. Che anca el cagnòt el me vardéva. Come a dirme: “Ah sém messi propri bem, ciao fighi anca a quele migole de briòss che te me butèvi per tera…”.
Ma no l’è finìa. Qualche stimàna endrìo la spósa la vèi a cà co na reclàm… dove i spièga che metendo sti zeròti su la panza… te pàssa le fam strane. E cosìta no te vei gnanca voia de zacar qualcòs fòra via, per dir. “Ah – gò dit – le solite monàe…”. Bem dèse dì dopo ariva el coriér co sto pàch piém de zeròti. Tra l’alter zà tut pagà. Pecà mandarlo de volta.
Lèzo le istruzióm: el zeròt el và més sula panza e tegnù lì non pù de dodese ore. Po’ subit su n’alter, ma no ne l’istéss posto neh. E alora tàca via co sto cava e meti zeròti. Co la spósa che ogni tant la zìga: “L’hat cambià el zeròt? Varda che l’è zamài le óndese… con quel che i è costai po’….”. E alora cava e meti i zeròti. Ma dopo dése dì, no se véde nesum segn de na panza che cala. Me par l’istéssa de prima, se non pèzo.
Na matina al bar encontro en vecio amico che fà ancora el veterinari. Tira mola e buta ghe conto sta storia dei zeròti… E lù, dopo averme scoltà come i dotori i scolta quei che ghe conta le so malatie, el se mete a rider… “Osc’ia – ghe digo – sónte mèss così malament?” – No – ‘l fa lu – l’è che i zeròti per no averghe fam e calàr no i và mèssi su la panza… E mi: “Scusa, ma quele l’è le istruziòm”. E lu: – No, sula bóca i va mèssi, sula bóca…”.
Tornà a cà, tiro fora sti zeròti e m’èn meto uno sula boca. Som chi che speto la spósa per dirghe che quei che ha mandà quel pàch i ha sbaglià a scriver le istruziom… cramento. No gh’è zeròti che tegna, guaiaporcole…
La Porta blindata
La me fà ‘n dì la spósa: “Tèi, hat sentì ala televisiom quanti ladri che gh’è en giro? L’è propri ‘n caso che no i sia ancora vegnui a trovarne. Che po’ el digo tuti i dì a tì e a to fiòl de no lassar averta la porta de soto. Che ‘n dì o l’alter ne i trovém en casa con tuta sta delinquenza che ghè ‘n giro. E tut mal sarìa forsi el caso de far qualcos per quela porta che zamài no serve gnanca na spalàda per butarla zo: basta che ‘l cagnòt el ghe daga en colp co le zàte …”.
Ogni dì l’era quela. Ogni volta che gh’era sul foi de cà netàe dai ladri tachéva via sta sólfa. Fin quando, stuf e agro de ste litanìe, hoi ciapà el sach en zima e som nà da un che vende ste porte … che ghe gnanca cole canonàe – i dìs nela reclam – te le buti zo.
I m’ha spiegà tut per bem. El perché, el percome. Ensoma, son vegnù su le sóe: “Va bem – gò dit – dai che metem su sta porta blindada a prova de calcagièra, bombe, tir che dovèssa sbagliar stràa … e soratut dei ladri neh.
I vèi a misurar. Po’, dopo en par de disgnoti, el me fa l’om dele porte blindae: “Eh, me sà che dovrem anca far mistéri da murador, scortar sta pareàna … massa larga”. E mi: “Alora la vegnerà a costar de pu enmagino …” – “No, no, dopo ne metém d’acordo, ma varda che per ste robe chi te ciàpi endrìo co la pensiom metà dei soldi spendùi en dese ani … l’è n’afare farlo ades co ste agevolaziom”. Entant che penso se durerò ancora dese ani per averghe endrio i soldi, n’operaio el varda le piastrèle … “Eh me sà che dovrèm farghe na zonta per nar a livel”. Mì tàso: “Afàri lori – digo tra de mi – no te volerai miga che sbassa tuta la casa per nar al livel de le piastrele …”.
Ariva ‘l dì dei laòri. E per la prima volta (avràla ciapà na pàca ‘n testa?) la spósa no la dìs gnent anca se ghè polver dapertut e l’è en nar avanti e endrìo de zent che sporca, e se porta drìo pacièca en casa. Che de solit se mi no vago denter en casa zopegando per tor le pianèle … l’è zìghi che i sènte da chì fim a Bolzam, se ‘l vent el va en sù. E da chi, da Vignole, fim a Verona, se ‘l và en zo.
Tut mal, dai, ala fim vei fora anca en bel laorét, dai. Quando te seri la porta te par de seràr quele caseforti dei cine, quele grose che ghe se vol la combinazion prima, e na bela forza dopo …
Po’ te sènti: “cloch”, propri cosita, quando te sèri. Tèi, l’è blindada la porta, no l’è miga en zugatol come quela de prima. Te te senti pu sicur na volta denter casa. Come dir: voi veder ades cossa che fà i ladri. Perché ghè anca el spionzìm no? Te poi anca saludarli, farghe l’ocièt, torli en giro se de là i scominzia i ruscàr. “Dai, provè a vegnir denter adès se sé boni, dai che voi veder come fé …”.
Passa ‘na stimana, ne pàssa doe, passa ‘n més, ne passa trei. Tut bem. “Vist? Bastéva poch per star en paze … se no gh’ero mi però a darte ‘n butom saressem ancora chì con quela portèla dal pit …” – la me fa la spósa vardandome da sora en zo anca se l’è pu picola de mi.
Ma se sa, mai dir gàt se no te l’hai més nel sach. E difati, eco che ve conto come l’è nada a finir. En dì ném a magnar na piza. Tuti convinti che l’altro (l’altra) el gàbia en borsa o nele scarsele o ‘n dove osc’ia el voleva (doveva) meterle, le ciàve de sta porta che no se squassa gnanca co la bomba atomica.
Quando se ariva la sera tardi scominziém tuti e doi a palparne. No per far quele robe che pensè, per zercar ste ciavi ‘cramento. La spósa a ‘n zerto punto la rebalta tut quel che la gà nela borsa. E no ve digo quanta roba vei fora. Mi nel borsèl gò sol i ociai, el telefonim e el portafòi … fago prima. Gnente: le ciàvi no le salta fora.
Se scominzia a pensar subit al fiòl. Ma quel … come semper l’è nà a Trent dai so amizi de l’università. Zamai el starà anca su a dormir dopo esser nà al concerto ( i ghe ciàma così adès nar a done … boh), e per de pù … sì l’ha lassà chì anca el telefonim (chi no gà testa gà la benzina de la me auto …) quel … diaolporco … se ‘l sènte sonar anca chi fòra quando provém a ciamarlo.
A sto punto provo a pensar de tor na scala, de nar a l’alteza de na finestra, de spacar el vedro … e entant che penso a questo me vegnirìa da dirghe a la spósa: “Tèi, ma le finestre no le è miga blindàe … come la metente se i ladri i vei co na scala? Ma per fortuna capìsso subit che no l’è el caso de nar su le scale. L’ultima volta che ho sbianchezà som cascà zo come ‘n broz. E da alora, quando cambia el temp, me vèi semper fora en mal de schena da …
Gnent da far. Scominzio a pensar anca al cagnot porèto. El dovrìa nar a far i so bisogni a st’ora, ciapar i so bei biscoti de premi che l’aspeta subit dopo … “Ma cossa pensit al cagnot che sem serài foraaaaa” – la gòsa la spósa.
E alora me decido.Ciamo i pompieri. Come i sente la me voze (con tute quele volte che i ciamévo a tute le ore dal giornal …) i me riconòss e – no saendo che son en pension – i me risponde. “No, niente da segnalare Galas”. E i mete zo.
Alora ritelefono. E ghe conto tut. Me sento come en bocia che ghe sta contando a so pare che l’ha sfracassà la machina. No, pezo, come n’embranà, n’imbezìle, Seràrse fòra … seràrse fora: ma se pòl? “Appena arriva il mio sostituto al centralino vengo su e vediamo cosa si può fare”.
La spósa entant l’è agitada. La telefona a so mama: “Ma sat cossa l’ha combinà me marì? No, vara … mi vegno su da ti a Trent. Ades vei anca i pompieri. I taierà la porta co la fiama osidrica me sa … t’enmaginit che casim? E dopo? Dormir co la porta averta? No, vegno su. Lasso chi quel deficiente de me marì …”.
La vardo e ghe digo: “Scolta varda che anca ti t’hai lassà denter le ciavi neh …” La me varda come se coi oci la volès brusarme e dopo la se senta en machina. E la ghe telefona a no so amica. Contandoghe le stesse robe.
Ale tante ariva i pompieri. Ghe spiego tut. E ghe digo: “Ma se pol averzela senza far tanti dani?” Lori i me varda e, come el mecanico quando te ghe porti l’auto che sèita a smorzarse, el dis: “Dipende, diamo un’occhiata. Ah, con quante mandate avete chiuso la porta?” – Osc’ia, digo, me sa che l’ho seràda e basta. Ero de corsa. Me som desmentegà le ciavi e anca de droparle me sa …”.
I pompieri i gà na casseta de atrezi. Grossa. Ma vedo che no i la caga gnanca. Um de lori el tira fora na carta de plastica, quele tipo bancomat per capirne, el la mete nele sfrìse e …oh, la porta la se averze.
Mi i vardo come se i fùs dei ànzoi pena vegnui zo dal zél a salvarme. Ghe ofrirìa la zena, soldi, tut quel che i vol … e enveze sti chì i scapa de corsa: “Scusi, ma abbiamo un intervento urgente, buonasera”. Resto lì davanti ala porta averta. Ariva anca la spósa: “L?hai taiada co la fiama?” – No, no nem denter che te conto come i ha fat. Ah, almen en giro de ciàvi d’ora en poi l’è meio darghel a sta porta sat … vei che te conto come i ha fat”.
www.televignole.it/diaolporco/ 
Edited by cesira.66 - 3/10/2018, 15:25Attached Image: 2D2FC5A5-4CD5-4274-9CEF-4ED06FE247C8
Non so bene dove sia Vignole ma dai posti citati dovrebbe essere Trentino zona Garda, tra Verona e Bolzano...
